Андрэй Стрыжак пакідае BYSOL

У аўторак ён падпіша дакументы аб перадачы заснавальніцтва. Таксама арганізацыю чакаюць структурныя змены, паведамляе фонд салідарнасці.

«Я прыняў рашэнне цалкам спыніць супрацоўніцтва з фондам BYSOL, —напісаў Стрыжак. — Гэтае рашэнне далося мне нялёгка, але я разумею тую адказнасць, якую несу за лёс аднаго з ключавых праектаў па дапамозе палітзняволеным і іх сем’ям.

BYSOL павінен працягваць працаваць. Я прыкладу ўсе намаганні, каб каманда змагла без страт перажыць крызіс. Спадзяюся, гэта верне давер да арганізацыі ў беларусаў і міжнародных партнёраў.

Арганізацыя ўжо пачала структурныя рэформы, і яны будуць даведзеныя да канца. BYSOL працуе далей».

Увесь склад цяперашняга дырэктарату раней абвясціў, што неўзабаве пакіне фонд. У камандзе ўжо створана працоўная група, якая ініцыюе змены ў статут і выпрацуе новы алгарытм абрання органу кіравання.

Чальцы арганізацыі, якія раней агучвалі свой намер пакінуць арганізацыю, атрымалі просьбу знайсці магчымасць перагледзець рашэнне ў сувязі з новымі абставінамі.

«Мы робім усё магчымае, каб гэтыя перамены не ўплывалі на дапамогу пацярпелым ад рэпрэсій і каб BYSOL заставаўся моцнай і эфектыўнай арганізацыяй. Спадзяёмся на вашу падтрымку і салідарнасць!» — гаворыцца ў звароце фонда.

Раней камісія правяла расследаванне ў сувязі з абвінавачваннямі топ-менеджэра арганізацыі ў харасменце. Паводле расследавання Андрэй Стрыжак адпраўляў паведамленні непажаданага характару і выкарыстоўваў службовае становішча. Некалькі жанчын атрымлівалі дапамогу ад BYSOL.